Að mynda norðurljósin

Það þarf smá undirbúning til að ná góðri mynd af norðurljósunum. Hér förum við yfir búnaðinn og stillingarnar sem skipta máli ef þú vilt mynda norðurljósin með myndavél frekar en síma.

Finndu stað meðan enn er bjart

Þótt norðurljósin geti blasað við um leið og þú stígur út fyrir dyrnar á Black Sand Hotel borgar sig að velja stað fyrirfram. Best er að hafa óhindrað útsýni til norðurs, en staðurinn þarf líka að vera aðgengilegur og öruggur.

Þar þarf að vera gott bílastæði, því það er ekki skynsamlegt að leggja í vegkanti, sama hversu rólegur vegurinn virðist. Staðurinn ætti líka að vera laus við ljósmengun, sem dregur úr litunum. Það getur jafnvel hjálpað að koma sér fyrir á bak við eitthvað sem skyggir á ljós.

Dugar snjallsími?

Nýlegir símar ná býsna góðum myndum af norðurljósunum, en fyrir bestu myndirnar borgar sig að hafa almennilega myndavél. Hún gefur þér fulla stjórn á stillingunum og handvirkan fókus, svo forgrunnurinn verði skarpur. Þetta fer eftir því hversu mikla alvöru þú leggur í myndatökuna.

Skildu símann samt ekki eftir heima, því stóri skjárinn hjálpar til við að sjá hvað er á lofti. Dauf norðurljós líta oft bara út eins og gráar slæður með berum augum, svo það er gagnlegt að beina símanum upp í loftið áður en þú stillir upp búnaðinum.

Þekktu myndavélina þína

Það er ekki nóg að eiga góða myndavél, þú þarft líka að kunna á hana. Ef þú hefur litla reynslu af næturmyndatöku skaltu fara út eitt kvöld heima, jafnvel bara út í garð, og prófa stillingarnar. Það þurfa ekki að vera norðurljós, ljósrákir frá bílum duga vel.

Prófaðu mismunandi lýsingartíma þar til þú finnur hvað hver stilling gefur. Ef þú ratar um takka og valmyndir án þess að rýna í vélina sparar það líka tíma, því sýningin getur verið stutt og þú vilt ekki missa af henni.

Taktu réttan þrífót með

Næst er það þrífóturinn. Á Suðurlandi getur verið hvasst, einkum við ströndina, svo þyngri þrífótur er stöðugri. Finndu jafnvægi á milli þess hve auðvelt er að bera hann og hve vel hann heldur vélinni kyrri, og hugsaðu um hversu langt þú þarft að bera hann.

Hristivörn hjálpar líka, og sveigjanlegir þrífætur eins og GorillaPod sem má festa á girðingu. Þú getur líka fundið skjólgóðan stað. Ef þú stillir upp á möl, snjó eða hálku er kostur að hafa þrífót með göddum.

Fjarstýrður afsmellari

Það að ýta á afsmellarann getur hreyft vélina, sama hversu varlega þú ferð, og það sést þegar myndirnar eru skoðaðar í fullri stærð. Fjarstýrður afsmellari er ódýr og einföld lausn. Þráðlausar útgáfur eru líka til, en mundu að kuldinn tæmir rafhlöður.

Önnur leið er að nota tímastilli vélarinnar og stilla hann á nokkrar sekúndur svo þú getir sleppt vélinni. Í báðum tilvikum þarf vélin að haldast kyrr alla lýsinguna, einkum ef hviður eru.

Annar búnaður

Fleira á heima í töskunni. Mikilvægust er fullhlaðin aukarafhlaða, geymd þar sem hún er varin fyrir kuldanum, því norðurljósakvöld geta staðið í nokkrar klukkustundir. Hleðslubanki fyrir símann er líka góð hugmynd.

Lítið vasaljós kemur að góðum notum. Staðurinn verður dimmur og ljósið hjálpar þegar þú fetar þig eftir stíg eða stillir upp búnaðinum. Ef fleiri eru með í för skaltu gæta þess að blinda engan og slökkva á ljósinu þegar það er ekki í notkun, svo þú spillir ekki myndunum þeirra.

Gerðu ráð fyrir rigningu. Þótt spáin lofi heiðskíru geta aðstæður breyst hratt. Hafðu mjúkan klút og linsuklúta til að halda linsunni hreinni, og vatnshelda tösku og regnvörn fyrir búnaðinn ef allt fer á versta veg.

Tæknilegar stillingar fyrir myndatökuna

Fyrst er best að skipta yfir í RAW svo þú getir unnið myndirnar eftir á. Leggðu aðdráttarlinsuna til hliðar og veldu víðlinsu sem nær stærri hluta himinsins. Stilltu á handvirkan fókus og óendanlegt (∞), og fínstilltu á fjarlægan fastan punkt, til dæmis kirkju eða tré.

ISO-stillingin ræður því hve næm myndflagan er fyrir ljósi. Byrjaðu í 1600, lækkaðu ef ljósin eru sterk og hækkaðu ef þau eru dauf. Prófaðu þig áfram á staðnum og gerðu ráð fyrir að breyta stillingunum þegar líður á nóttina.

Ljósopið stýrir því hve mikið ljós berst inn í vélina. Byrjaðu á lágu f-gildi, til dæmis f/2.8 eða f/4, og skoðaðu útkomuna. Ef myndin er of ljós hækkarðu f-gildið, og ef hún er of dökk lækkarðu það. Notaðu þetta með lokarahraðanum, sem getur verið frá 10 upp í um 30 sekúndur eftir því hve virk norðurljósin eru.