Fullkominn dagur á Reykjanesi

Einn helsti kosturinn við Black Sand Hotel er staðsetningin. Hvort sem þú ætlar að keyra Gullna hringinn, skreppa austur eftir suðurströndinni eða halda vestur á Reykjanes, og við mælum með öllu þrennu, er stutt að fara. Hér beinum við sjónum að Reykjanesi, þessu villta og hrjóstruga svæði, og gefum ráð um hvernig þú færð sem mest út úr deginum.

Athugasemd um eldvirknina

Síðan Fagradalsfjall vaknaði árið 2021 eftir langa kyrrð hafa gengið yfir goshrinur á litlum hluta Reykjanesskagans. Þær hafa að mestu verið í kringum Grindavík, og meðan gos stendur yfir eru sumir vegir lokaðir. Virknin er þó staðbundin og Keflavíkurflugvöllur hefur verið opinn allan tímann. Það borgar sig að fylgjast með stöðunni og vegalokunum þegar þú skipuleggur daginn, en láttu það ekki fæla þig frá. Nýttu þér Road.is, fréttir RÚV á ensku og vef Visit Reykjanes til að fá nýjustu upplýsingar.

Hringur um skagann

Frá Black Sand Hotel er skynsamlegt að keyra hring um Reykjanesskagann, því margir áhugaverðustu staðirnir eru við ströndina. Þú gætir líka viljað taka krók inn í land, til dæmis í Bláa lónið eða, á norðurljósatímabilinu, í Aurora Basecamp (meira um hvort tveggja hér á eftir). Það skiptir ekki máli hvort þú ferð réttsælis eða rangsælis, en eins og alltaf á Íslandi borgar sig að hafa áætlunina sveigjanlega. Ef það er kalt, hvasst eða rigning er gott að vita að í Keflavík eru nokkur góð söfn.

Það helsta á Reykjanesi

Kleifarvatn og Grænavatn

Á Reykjanesskaganum eru falleg vötn og Kleifarvatn er þeirra stærst. Í það renna engir lækir heldur kemur vatnið neðanjarðar, og í einu horninu streymir heitt vatn úr hver. Vatnið laðar að ljósmyndara og veiðifólk, enda nóg af fiski. Grænavatn, skammt frá, er miklu minna, en skærgrænn liturinn, sem stafar af miklu steinefnainnihaldi, heillar alla sem eiga leið hjá.

Seltún í Krýsuvík

Landslag Reykjanesskagans er viðurkenndur UNESCO-jarðvangur, og ein helsta ástæðan eru jarðhitasvæði eins og Seltún í Krýsuvík. Svæðið er litríkt og lyktsterkt, með sjóðandi leirhverum og gufustrókum. Brennisteinslyktin liggur í loftinu þegar þú gengur eftir timburpöllunum, og útsýnið er magnað. Farðu varlega og víktu aldrei af stígunum, því sjóðheitt vatnið getur valdið alvarlegum brunasárum.

Selatangar

Lífið á Íslandi fyrr á tíð var gjörólíkt því sem við þekkjum. Á Selatöngum héldu vermenn til á milli róðra, berskjaldaðir fyrir veðri og vindum. Um 1880 var verstöðin komin í eyði og eftir standa hrundir veggir, svo söguáhugafólk þarf að nota ímyndunaraflið. Selatangar eru á suðurströnd Reykjaness austan við Grindavík, og þangað liggur grófur slóði fyrir fjórhjóladrifna bíla.

Fagradalsfjall

Árið 2021 gaf jarðskjálftahrina við Fagradalsfjall til kynna að eitthvað væri í aðsigi. Eftir langa kyrrð rann hraun um dalinn í fyrsta sinn í 8.000 ár, og fólk streymdi að til að ganga upp á útsýnisstaði yfir gígana og hraunið. Hraunið hefur nú kólnað í svarta breiðu með gulum brennisteinsútfellingum og hefur engu tapað af aðdráttaraflinu. Gangan er krefjandi, svo ef þú vilt fara hana er gott að ætla tvo daga í Reykjanesið. Kannaðu stöðuna áður en þú leggur af stað.

Brimketill

Náttúran getur skapað ótrúlegt landslag og það á sannarlega við hér á suðurströnd skagans. Við Brimketil rann hraun eitt sinn í hafið, og sjórinn hefur sorfið storknað hraunið í náttúrulegar skálar. Það er hrífandi að horfa á sjóinn ólga og freyða og öldurnar skella á klettunum. Ekki fara út í, jafnvel þótt sjórinn virðist kyrr: straumurinn er hættulegur og staðurinn er aldrei öruggur til sunds.

Gunnuhver

Á Íslandi er nóg af jarðhitasvæðum, en Gunnuhver, á suðvesturhorni Reykjanesskagans, sker sig úr. Þar er stærsti leirhver landsins, heilir 20 metrar í þvermál, þar sem gufa og vatn hafa breytt berginu í leir sem kraumar af krafti. Nafnið er komið frá afturgöngunni Guðrúnu Önundardóttur, Gunnu, sem lagði bölvun á svæðið eftir deilur við landsdrottin sinn. Sagan segir að hún hafi verið tæld ofan í hverinn og haldið sig þar æ síðan.

Reykjanesviti og nágrenni

Reykjanes er góður staður til fuglaskoðunar og sjófuglar safnast saman á klettóttri ströndinni, til dæmis við Valahnúk. Eftir árstíma sérðu fýl, langvíu, ritu, súlu og lunda, sem verpir í björgunum. Fyrr á tíð hefðirðu jafnvel getað séð geirfugl, sem nú er útdauður og minnst með bronsstyttu við hafið. Á þessum afskekkta stað er auðvelt að skynja kraft aldanna sem brotna á klettunum, og ljóst hvers vegna vita var þörf á þessari varasömu strönd. Fyrsti viti Íslands var reistur hér árið 1878 og núverandi viti á Bæjarfelli er frá 1907.

Volcano Man hljómborðin

Ef þú hafðir gaman af mynd Will Ferrell, Eurovision Song Contest: The Story of Fire Saga, áttu annað erindi á syðsta odda Reykjanesskagans. Volcano Man hljómborðin eru í miklu uppáhaldi hjá aðdáendum og tilvalin fyrir sjálfu. Þau eru orðin dálítið veðruð eftir nokkur ár í íslensku veðri en samt vel þess virði að finna. Liðkaðu raddböndin ef þú ætlar að taka lagið.

Brúin milli heimsálfa

Keyrðu norður og fljótlega kemurðu að Brúnni milli heimsálfa, sem stundum er kennd við Leif heppna. Ísland liggur á tveimur flekum, Norður-Ameríkuflekanum og Evrasíuflekanum, og flekaskilin liggja á ská yfir landið frá suðvestri til norðausturs. Hér geturðu gengið út á brú yfir flekaskilin. Við fyrstu sýn virðist þetta vera uppþornaður árfarvegur, en í raun ertu með sinn fótinn í hvorri heimsálfunni.

Sandvík

Á Íslandi eru nokkrar strendur sem vert er að sjá, eins og Rauðisandur á Vestfjörðum og að sjálfsögðu Reynisfjara við Vík. Strandlengja Reykjaness er víðast grýtt, en á vesturjaðrinum er Sandvík. Á leiðinni norður frá brúnni liggur vegurinn líka fram hjá Stampagígunum, sem eru vel þess virði að stoppa við. Í Sandvík breiðir úr sér breitt belti af svörtum sandi með grónum sandöldum að baki, og ströndin lék japönsku eyjuna Iwo Jima í kvikmynd Clint Eastwood, Flags of Our Fathers, frá 2006.

Keflavík

Keflavík er ekki bara flugvöllurinn, bærinn er líka góður áfangastaður ef veðrið versnar, því þar eru nokkur áhugaverð söfn. Ef þú elskar tónlist skaltu kíkja á Rokksafn Íslands, sem segir sögu íslenskrar tónlistar, en miðað við fólksfjölda hefur Ísland alið ótrúlega margt farsælt tónlistarfólk, meðal annars Björk, Sigur Rós og Daða Frey. Í Víkingaheimum er svo Íslendingur, eftirmynd Gaukstaðaskipsins, sem sigldi frá Íslandi til Norður-Ameríku til að minnast siglinga fyrstu landkönnuðanna.

Bláa lónið

Bláa lónið er líklega frægasta jarðhitalón landsins. Það varð upphaflega til úr affallsvatni frá jarðvarmavirkjuninni í grenndinni en er löngu orðið áfangastaður út af fyrir sig. Mjólkurblátt vatnið og kolsvart hraunið í kring eru falleg andstæða, og með bar í lóninu, meðferðum og góðum veitingastað er það verðugur endir á fullkomnum degi á Reykjanesi. Ráðlegt er að bóka fyrirfram á annatímum.

Aurora Basecamp

Ef þú ert á ferðinni á norðurljósatímabilinu er vel þess virði að kíkja í Aurora Basecamp. Stöðin er á dimmum stað á austurhluta skagans og mætti kalla hana æfingabúðir fyrir norðurljósaveiðara. Þar býður leiðsögumaður þér inn í notalegt hús þar sem þú lærir vísindin á bak við norðurljósin og hvernig hægt er að lesa úr spánni. Andrúmsloftið er afslappað og nóg af tækifærum til að skjótast út og prófa það sem þú lærðir, eða hlýja þér við eldinn með heitan drykk. Ef þú ferð snemma í dvölinni á Black Sand Hotel hefurðu þekkinguna til að halda norðurljósaleitinni áfram á dimmari stöðum á suðurströndinni, fjarri ljósmengun.